Брускети со тутрички
Брускети готови за 30 минути. Брз и лесен рецепт направен со нашите Тутрички, шери домати и фета сирење.
Кога ти се имаат најавено гости, верувам дека овој рецепт ќе ти дојде од помош за брза и вкусна закуска. Но, да ги приготвиш и за твојата фамилија знам дека ќе ги обожаваат сите.
Кои кифлички ги користев?
За овие брускети, одбрав да ги користам нашите тутрички, затоа што потпечени се неверојатни и некако ми беа совршени за овој рецепт. Секако можеш да користиш и лепче, верувам дека ќе биде подеднакво вкусно. Препорачувам да се користат тутрички постари од 2 дена, затоа што со текот на печењето омекнуваат, а одозгора имаат крцкава површина.
Еден совет, пред да се приготват шери доматите, пожелно е да бидат исушени од миењето. Затоа што, доколку се мокри, во текот на печењето заедно со маслиновото масло ќе направат хаос во рерната😅.
Шеќерот се додава за да се неутрализира киселкастиот вкус на шери доматите. Секогаш додавам малку шеќер кога правам сосови со свежи домати или конзервирани домати.
Најново од Блог
-
-
Како правилно да се чува лебот?
24 октомври, 2018
брускети со тутрички
Брускети готови за 30 минути. Брз и лесен рецепт направен со нашите Тутрички, шери домати и фета сирење.
Време за подготовка: 30 минути
Вкупно време: 30 минути
Aвтор:
Ивана | ФРИ-ПЕК
СОСТОЈКИ
- 10 тутрички
- 320 g шери домати
- 150 g фета сирење
- 70 g грчки јогурт
- 1 лажичка лимон
- 3 лажици маслиново масло (за шери доматите) + за премачкување
- Оригано
- Сол и црн бибер
- Босилек
- Мајчина душичка
- Прстофат шеќер
ПОСТАПКА
- Најпрво рерната се вклучува на 200°С, за да се загрее.
- Шери доматите се сечат на четвртина или половина и се ставаат во поширок сад. Во садот се додаваат маслиновото масло, сол, шеќер, оригано и мајчина душичка и се промешуваат за да се распоредат рамномерно сите состојки. Вака подготвените шери домати се ставаат на печење во рерна на 200°С, 15-20 минути, додека омекнат.
- На поголема тава за печење се става хартија за печење и се редат тутричките, пресечени на пола. Се премачкуваат со маслиново масло и се ставаат на печење и тие на 200°С, 7-8 минути, додека да фатат златна боја. Доколку имаш простор во рерната може заедно да се печат и тутричките и шери доматите.
- Во друг сад се прави намазот, се додава фета сирењето, грчкиот јогурт, лимонот и црн бибер (доколку не ти е солено, може и сол да се додаде). Се соединуваат сите состојки и се трга настарана.
- Откако ќе се испечат тутричките се премачкуваат со намазот од фета сирење, одозгора се редат испечените шери домати и на крај се зачинува со босилек.
